Yn dilyn llwyddiant eu halbwm diweddaraf Blue Eyed Soul, sydd wedi cyrraedd y 10 uchaf yn y siartiau, mae’r anfarwolion pop a chanu’r enaid wedi cyhoeddi sioe arbennig yng ngogledd Cymru ar 14 Awst. 

Meddai Mick Hucknall am ddychwelyd i’r llwyfan yn yr haf: 

“Dw i wedi treulio’r rhan fwyaf o’m mywyd yn mynd allan a chanu i bobl, felly roedd hi’n rhyfedd peidio â gallu gwneud hynny y llynedd a’r flwyddyn gynt. Dw i wedi gweld eisiau mynegi fy hun. Mae’n hynod ysbrydoledig bod pobl yn gallu mynd i weld bandiau unwaith eto. Dw i’n edrych ymlaen yn fawr iawn.”

Mae Simply Red wedi gwerthu dros 60 miliwn o albymau ar hyd a lled y byd – gyda 5 ohonynt wedi cyrraedd brig y siartiau yn y DU. Ar ben hynny mae eu fideos wedi’u gwylio dros biliwn o weithiau ar YouTube.

Eu clasur Stars yn 1991 oedd yr albwm a werthwyd orau am ddwy flynedd yn olynol ym Mhrydain ac Ewrop. Maen nhw wedi cyrraedd brig ‘Billboard’ yr UDA gyda Holding Back The Years ac If You Don’t Know Me By Now.